Liza Bronner se nuwe CD is vanaf einde September landwyd beskikbaar en met ‘n titel soos Vir eers is dit net ek gee sy sommer dadelik haar aanhangers ‘n voorsmakie van wat hulle te wagte kan wees! Agter Liza se sprankelende persoonlikheid en asemrowende glimlag kruip daar ‘n baie sagte hart weg, en dit word in haar musiek gereflekteer – dis vrolik, hartseer en speels, maar as jy tussen die lyne lees is daar beslis ‘n dieper boodskap vir die luisteraar.

Die nuwe CD bevat ‘n paar lekker ritmiese en opbeurende liedjies soos ‘Alles in ‘n hartklop’ (wat ook haar eerste musiekvideo is) en ‘Sewentien’. Kombineer dit met ‘n paar ballades soos ‘Vreemdeling’, ‘Baie lief vir jou’ en ‘Vir eers is dit net ek’ en die eindproduk is ‘n album wat jou knieë lam maak. Met dié album het Liza ook vir die eerste maal haar hand aan ‘n paar oorspronklike komposisies gewaag en dit beloof om haar aanhangers gaande te hê!

Die produksie was in die bekwaamde hande van vervaardiger Johan Rautenbach (Bobby van Jaarsveld, Eden, Bok van Blerk, Lianie May en vele ander sterre).  Ander verrassings sluit in die duet met Cindy Alter (van Clout-faam) met haar oorspronklike treffer ‘Substitute’ en die duet met ‘Liza se Ricci’!

Ricci is natuurlik die bekende musikant en sanger Ricus Nel, en met dié liefde gaan dit ‘great’, volgens Liza. Maar Ricus (en musiek natuurlik) is nie die enigste liefdes in haar lewe nie – Liza is net so mal oor kinders soos hulle oor haar, en haar betrokkenheid by liefdadigheid is vir Liza tweede natuur.

Met drie CD’s op die rakke; verskeie nominasies vir musiektoekennings; gereelde optredes; vele rooitapyt-verskynings, ‘n nuwe plaatemaatskappy (HIT Records) asook al haar aanhangers, is Liza Bronner sonder twyfel reg vir die nuwe fase in haar loopbaan. Sy is meer volwasse en gevestig, en die nuwe CD sal beslis alle “onbekeerdes” na haar vertonings lok! Liza Bronner is hier om te bly, en soos ‘n goeie rooiwyn raak sy net beter en beter!

Vir meer inligting besoek Liza se webtuiste by www.lizabronner.co.za of haar Facebook-bladsy by https://www.facebook.com/pages/Liza-Bronner/48061624700 of skakel haar bestuurder Belinda by 000 0000 000 of besoek HIT Records aanlyn by www.hitrecords.co.za